“Azərbaycanın müstəqillik tarixində enerji sektoru təkcə iqtisadi inkişafın deyil, həm də dövlət quruculuğunun, beynəlxalq tərəfdaşlıqların və geosiyasi mövqelərin möhkəmlənməsinin əsas sütunlarından biri olub”.

Bu sözləri Milli Məclisin deputatı Kamaləddin Qafarov mətbuata verdiyi açıqlamasında deyib.

O, bildirib ki, iyunun 1-də Bakı Enerji Həftəsi çərçivəsində keçirilən tədbirlərin açılış mərasimində Prezident İlham Əliyevin səsləndirdiyi fikirlər də məhz bu reallığın növbəti təsdiqi kimi diqqəti cəlb edir. “Dövlət başçısının vurğuladığı kimi, vaxtilə Xəzər Neft və Qaz Sərgisi kimi fəaliyyətə başlayan platforma sonradan genişlənərək Bakı Enerji Həftəsinə çevrilib. Bu fakt təkcə tədbirin miqyasının böyüməsini deyil, həm də Azərbaycanın enerji sektorunda keçdiyi inkişaf yolunu əks etdirir. Əslində, ötən onilliklər ərzində ölkənin enerji strategiyasının formalaşması və beynəlxalq enerji bazarında etibarlı tərəfdaş kimi tanınması məhz bu platformalarda atılan addımlarla sıx bağlıdır”

Fikirlərini davam edən millət vəkili Prezident İlham Əliyevin çıxışında ölkənin makroiqtisadi göstəriciləri ilə bağlı yer alan məqamları xüsusi qeyd edib: “Son illərdə qlobal iqtisadiyyatda baş verən mürəkkəb proseslərə baxmayaraq, Azərbaycanın maliyyə sabitliyini qoruyub saxlaması, beynəlxalq reytinq agentliklərinin qiymətləndirmələrində mövqeyini yaxşılaşdırması və investisiya səviyyəli reytinq əldə etməsi iqtisadi siyasətin səmərəliliyini nümayiş etdirir. Dövlət başçısının qeyd etdiyi kimi, yoxsulluğun 5 faiz səviyyəsinə endirilməsi, işsizliyin minimum göstəricilər ətrafında saxlanılması və xarici borcun əhəmiyyətli dərəcədə azaldılması iqtisadi dayanıqlığın əsas indikatorları hesab olunur. Bu nəticələr təsadüfi deyil. Onların arxasında enerji gəlirlərinin düzgün idarə olunması, Dövlət Neft Fondu vasitəsilə həyata keçirilən uzunmüddətli strategiya və qeyri-neft sektorunun inkişafına yönəlmiş siyasət dayanır. Müasir mərhələdə Azərbaycanın enerji siyasətinin yeni istiqaməti yaşıl enerji və elektrik enerjisi ixracı ilə bağlıdır. Prezident İlham Əliyevin çıxışında qeyd etdiyi Qara dəniz enerji kabeli layihəsi bu baxımdan strateji əhəmiyyət daşıyır. Azərbaycan, Gürcüstan, Rumıniya və Macarıstan arasında həyata keçirilən bu təşəbbüs Xəzər regionunda istehsal ediləcək yaşıl enerjinin Avropa bazarına çıxarılmasını təmin edəcək. Bununla yanaşı, Azərbaycan-Gürcüstan-Türkiyə-Bolqarıstan elektrik kabeli layihəsi də regional enerji əməkdaşlığının yeni mərhələsini formalaşdırır. Bu layihələr təkcə enerji ixracının şaxələndirilməsi deyil, həm də Avropanın enerji təhlükəsizliyinə verilən töhfənin artırılması baxımından mühüm əhəmiyyət kəsb edir”.

Qarşıdan gələn müqəddəs Qurban bayramı insanlar arasında mərhəmət, birlik və həmrəylik hisslərini daha da möhkəmləndirən ən dəyərli bayramlardan biridir. Bu müqəddəs günlər insanları bir-birinə daha yaxın edir, paylaşmağın və xeyirxahlığın əsl mənasını cəmiyyətə bir daha xatırladır. Ehtiyacı olan ailələrə yardım göstərmək, aztəminatlı insanlara dəstək olmaq, şəhid ailələri və qazilərə diqqət ayırmaq hər zaman milli-mənəvi dəyərlərimizin əsas hissəsi olub. Bu ali dəyərləri daim yaşadan və insanlara nümunə olan şəxslərdən biri də Şəhriyar müəllimdir.

Şəhriyar müəllim uzun illərdir insanlara göstərdiyi diqqət, səmimiyyət və qayğıkeş münasibəti ilə cəmiyyətin hörmət qazanan ziyalılarından biri kimi tanınır. O, xüsusilə müqəddəs bayram günlərində ehtiyacı olan ailələrin yanında olmağı özünə mənəvi borc hesab edir. Onun təşəbbüsü və dəstəyi ilə bir çox ailələrin evinə sevinc daxil olur, insanların bayramı daha rahat və xoş keçirməsi üçün müxtəlif yardımlar göstərilir. Şəhriyar müəllim hesab edir ki, Qurban bayramının ən böyük mənası insanların bir-birinə dayaq olması, paylaşmağı və mərhəməti unutmamasıdır.

Onun xeyirxah fəaliyyəti yalnız bayram günləri ilə məhdudlaşmır. Şəhriyar müəllim ilboyu insanların problemlərinə həssas yanaşan, cəmiyyətin sosial məsələlərinə biganə qalmayan insanlardan biridir. O, aztəminatlı ailələrin qayğıları ilə maraqlanır, ehtiyacı olan insanlara dəstək göstərməyə çalışır və bu addımları ilə insanların dərin rəğbətini qazanır. İnsanlar onun səmimi münasibətini və xeyirxahlığını yüksək qiymətləndirirlər.

Şəhriyar müəllim eyni zamanda dövlətinə və xalqına ürəkdən bağlı olan vətənpərvər ziyalı kimi də tanınır. O, Azərbaycanın milli maraqlarını hər zaman üstün tutan, dövlətçilik prinsiplərinə sadiqliyi ilə seçilən şəxslərdəndir. Ölkəmizin inkişafı, sabitliyin qorunması və xalqın rifahının yüksəldilməsi istiqamətində həyata keçirilən siyasəti daim dəstəkləyir. Onun dövlətə və dövlətçiliyə bağlılığı ətrafındakı insanlar üçün də örnək hesab olunur.

Bu gün Azərbaycan Respublikasının Prezidenti İlham Əliyev tərəfindən həyata keçirilən uğurlu siyasət nəticəsində ölkəmiz regionun ən güclü dövlətlərindən birinə çevrilib. Azərbaycanın inkişafı, iqtisadi gücünün artması, işğaldan azad edilmiş torpaqlarda aparılan genişmiqyaslı quruculuq işləri hər bir vətəndaş kimi Şəhriyar müəllim tərəfindən də böyük qürur hissi ilə qarşılanır. O, ölkəmizdə aparılan inkişaf strategiyasını yüksək qiymətləndirən və bu siyasətə daim dəstək verən insanlardandır.

Şəhid ailələrinə və qazilərə göstərilən diqqət Şəhriyar müəllimin fəaliyyətində xüsusi yer tutur. O, Vətən uğrunda canından keçmiş qəhrəmanlarımızın ailələrinə hər zaman həssas münasibət göstərməyə çalışır, qazilərimizin problemləri ilə maraqlanır və onların yanında olmağa xüsusi önəm verir. Çünki o yaxşı anlayır ki, Azərbaycanın bugünkü qüruru və qalibiyyəti şəhidlərimizin və qazilərimizin fədakarlığı sayəsində əldə olunub.

İnsanlarla münasibətdə səmimiyyəti və diqqətcil davranışı Şəhriyar müəllimi fərqləndirən əsas xüsusiyyətlərdəndir. O, hər bir müraciətə anlayışla yanaşır, insanlara mənəvi dəstək göstərməyə çalışır və cəmiyyətin problemlərinə laqeyd qalmır. Məhz bu keyfiyyətləri onu insanların hörmət bəslədiyi nüfuzlu şəxslərdən birinə çevirib.

Müqəddəs Qurban bayramı münasibətilə Şəhriyar müəllimi ürəkdən təbrik edir, ona möhkəm can sağlığı, uzun ömür və gələcək fəaliyyətində yeni uğurlar arzulayırıq. Arzu edirik ki, onun gördüyü xeyirxah işlər, insanlara göstərdiyi diqqət və qayğı daim davam etsin, müqəddəs bayram sevincini paylaşdığı insanlar tərəfindən hər zaman minnətdarlıqla xatırlansın. Qurban bayramı hər bir evə ruzi-bərəkət, sevinc və xoşbəxtlik gətirsin.

“Döyüş alnımıza yazılıb”

Azərbaycan xalqının tarixində elə igid oğullar var ki, onların həyatı Vətənə xidmətin, dövlətə sədaqətin və xalq sevgisinin canlı nümunəsinə çevrilib. Bu gün Azərbaycan Ordusunun qüdrətindən danışarkən xüsusi ilə bir hərbi birlik daim ön sırada çəkilir — Xüsusi Təyinatlı Qüvvələr... Çünki XTQ yalnız bir hərbi struktur deyil, eyni zamanda, Vətən sevgisinin, dəmir iradənin, qorxmazlığın və peşəkarlığın simvoludur. “Döyüş alnımıza yazılıb” deyən XTQ döyüşçüləri illərlə Azərbaycan dövlətinin təhlükəsizliyi və torpaqlarımızın azadlığı uğrunda canlarından keçməyə hazır olduqlarını sübut ediblər.

Azərbaycan xalqının Ümummilli lideri Heydər Əliyev uzaqgörən siyasəti ilə ölkənin gələcəyini düşünərək 1999-cu ildə Xüsusi Təyinatlı Qüvvələrin əsasını qoydu. Ulu Öndər yaxşı bilirdi ki, gələcəkdə Azərbaycanın qarşısında duran ən böyük məsələlərdən biri işğal altında olan torpaqların azad edilməsidir. Bunun üçün isə yüksək peşəkarlığa malik, fiziki və mənəvi cəhətdən tam hazırlıqlı xüsusi hərbi qüvvələrə ehtiyac vardı. Məhz bu düşüncə ilə yaradılan XTQ qısa müddət ərzində regionun ən güclü xüsusi təyinatlı birliklərindən birinə çevrildi.

XTQ sıralarında xidmət etmək hər hərbçiyə nəsib olan bir tale deyil. Bu yol böyük əzmkarlıq, ciddi hazırlıq, dəmir intizam və Vətənə sonsuz sevgi tələb edir. İllərlə çətin təlimlərdən keçən, ən ağır şəraitlərdə döyüş tapşırıqlarını yerinə yetirən XTQ döyüşçüləri yalnız silah gücü ilə deyil, mənəvi iradələri ilə də seçiliblər. Onların əsas amalında bir fikir dayanırdı — Azərbaycan torpaqları işğaldan azad olunmalıdır.

2020-ci ildə baş verən 44 günlük Vətən müharibəsi isə XTQ-nin gücünü və peşəkarlığını bütün dünyaya nümayiş etdirdi. Azərbaycan Ordusunun həyata keçirdiyi uğurlu əməliyyatların önündə məhz XTQ döyüşçüləri dayanırdı. Dağları, keçilməz qayaları, mina sahələrini aşaraq düşmənin ən möhkəm istehkamlarını darmadağın edən xüsusi təyinatlılarımız qəhrəmanlıq dastanı yazdılar. Onlar sübut etdilər ki, Azərbaycan əsgəri yalnız döyüşməyi deyil, qalib gəlməyi də bacarır.

Bu tarixi Zəfərin memarı isə Azərbaycan Respublikasının Prezidenti, Ali Baş Komandan İlham Əliyev oldu. Onun qətiyyəti, siyasi iradəsi və xalqa verdiyi birlik mesajları Azərbaycan Ordusuna əlavə güc verdi. Prezident İlham Əliyevin rəhbərliyi altında həyata keçirilən “Dəmir Yumruq” əməliyyatı dünya hərb tarixində xüsusi yer tutdu. Bu əməliyyat yalnız hərbi qələbə deyildi, bu, Azərbaycan xalqının milli ruhunun, birliyinin və gücünün təcəssümü idi.

“Dəmir Yumruq” siyasəti əslində təkcə hərbi əməliyyat anlayışı deyildi. Bu siyasət dövlətin gücünü, xalqın birliyini və ordunun yenilməzliyini özündə birləşdirən milli ideologiyaya çevrildi. XTQ döyüşçüləri isə bu siyasətin ən önəmli dayaqlarından biri oldular. Onlar hər zaman Ali Baş Komandanın əmrlərini yüksək peşəkarlıqla yerinə yetirərək Azərbaycanın haqq savaşında ön cəbhədə dayandılar.

XTQ döyüşçülərinin “Biz hər zaman Cənab İlham Əliyevin ‘Dəmir Yumruq’ siyasətinin bir parçası olmuşuq” fikri sadəcə bir ifadə deyil, bu, onların həyat amalını əks etdirən gerçək bir anddır. Çünki xüsusi təyinatlılar üçün Vətən hər şeydən öncə gəlir. Onlar üçün döyüş meydanı sadəcə xidmət yeri deyil, həm də müqəddəs missiyadır. Vətən uğrunda canından keçən şəhidlərin qisasını almaq, torpaqları azad etmək və Azərbaycan bayrağını işğaldan azad olunan torpaqlarda dalğalandırmaq onların ən böyük arzusu idi.

Aprel döyüşlərindən başlayan qəhrəmanlıq yolu 44 günlük Vətən müharibəsində daha da şərəfli tarixə çevrildi. 2016-cı ilin Aprel döyüşləri Azərbaycan Ordusunun gücünü nümayiş etdirdi və ordumuzun gələcək böyük Zəfərə hazır olduğunu göstərdi. XTQ döyüşçüləri həmin əməliyyatlarda da xüsusi şücaət göstərərək strateji yüksəkliklərin azad edilməsində mühüm rol oynadılar.

2021-ci ildə Kəlbəcər istiqamətində sərhədlərimizin bərpası əməliyyatları, 2022-ci ildə həyata keçirilən “Sarsıdıcı Zərbə” əməliyyatı və 2023-cü ilin “Antiterror” tədbirləri Azərbaycan Ordusunun gücünü bir daha dünyaya nümayiş etdirdi. Bu əməliyyatlarda iştirak edən XTQ döyüşçüləri böyük peşəkarlıq və cəsarət göstərərək qarşıya qoyulan bütün tapşırıqları uğurla yerinə yetirdilər.

Xankəndi torpağına 32 ildən sonra ilk ayaq basan qəhrəmanlardan biri olmaq isə hər bir hərbçi üçün tarixi bir zəfərdir. Bu, yalnız fiziki olaraq bir torpağa qədəm qoymaq deyildi. Bu, şəhidlərin ruhuna verilən sözün yerinə yetirilməsi idi. Bu, illərlə həsrətində olduğumuz torpaqlara qayıdışın başlanğıcı idi. O torpaqlarda Azərbaycan bayrağının dalğalanması uğrunda minlərlə igid oğul canından keçdi. XTQ döyüşçüləri isə həmin müqəddəs missiyanın önündə gedən qəhrəmanlar oldular.

Ali Baş Komandan İlham Əliyevin XTQ döyüşçüləri ilə görüş zamanı söylədiyi “Sizinlə fəxr edirəm” sözləri hər bir xüsusi təyinatlı üçün ən böyük mükafatlardan biri oldu. Çünki dövlət başçısının verdiyi bu qiymət onların çəkdiyi əziyyətin, göstərdiyi qəhrəmanlığın və Vətən uğrunda apardığı mübarizənin ən ali dəyəri idi. Bu sözlər XTQ döyüşçülərinə yalnız qürur deyil, eyni zamanda gələcək nəsillərə örnək olacaq böyük mənəvi güc verdi.

Bu gün Azərbaycan Ordusu regionun ən güclü ordularından biridir. Bu gücün formalaşmasında XTQ-nin xüsusi rolu vardır. Onlar təkcə döyüş meydanında deyil, həm də gənc nəslin vətənpərvər ruhda yetişməsində nümunəyə çevriliblər. Gənclər bu qəhrəmanların həyat yoluna baxaraq anlayırlar ki, Vətən sevgisi sadəcə sözlə deyil, əməl ilə sübut olunur.

XTQ döyüşçülərinin həyat yolu bizə bir həqiqəti öyrədir: Vətən uğrunda xidmət ən ali şərəfdir. Çünki torpaq uğrunda ölən varsa, Vətəndir. Azərbaycan əsgəri bunu döyüş meydanında öz qanı ilə sübut etdi. Bu gün Qarabağda dalğalanan üçrəngli bayrağımız şəhidlərin qanı, qazilərin qəhrəmanlığı və ordumuzun gücü hesabına ucalır.

“Döyüş alnımıza yazılıb” deyən XTQ döyüşçüləri əslində Azərbaycan xalqının ruhunu ifadə edirlər. Çünki bu xalq tarix boyu mübarizə aparıb, heç vaxt əyilməyib və öz haqqını qorumağı bacarıb. Azərbaycan Ordusunun qəhrəman oğulları sübut etdilər ki, Vətən sevgisi qarşısında heç bir maneə dayana bilməz.

Bu gün Azərbaycan xalqı qalib xalq kimi yaşayırsa, bunun əsas səbəblərindən biri XTQ kimi qəhrəman hərbi birliklərin varlığıdır. Onların şücaəti tarix kitablarına qızıl hərflərlə yazılıb və gələcək nəsillər bu qəhrəmanlıq salnaməsini daim qürurla xatırlayacaqlar.

Yaşasın Azərbaycan xalqı!
Yaşasın Azərbaycan Ordusu!
Yaşasın Ali Baş Komandan İlham Əliyev!

Şərafəddin Xankişiyev

Xüsusi Təyinatlı Qüvvələrin ehtiyatda olan hərbiçisi

Vətən müharibəsi iştirakçısı

Bakıda Azərbaycan Həmkarlar İttifaqları Konfederasiyası (AHİK), Türkmənistan Milli Həmkarlar İttifaqları Mərkəzi (TMHİM), Beynəlxalq Əmək Təşkilatı (BƏT) İşçilərin Fəaliyyəti Bürosunun (BƏT-ACTRAV) birgə təşkilatçılığı ilə “İqlim dəyişikliyi üzrə həmkarlar ittifaqlarının fəaliyyəti” mövzusunda konfrans keçirilib.

Tədbirdə dövlət rəsmiləri, Milli Məclisin deputatları, qeyri-hökumət və ictimai təşkilatların təmsilçiləri, Azərbaycan və Türkmənistan həmkarlar ittifaqlarının, BƏT-in və İslam Əməkdaşlıq Təşkilatının (İƏT) Əmək Mərkəzinin nümayəndələri iştirak ediblər.
Konfrans Azərbaycan Respublikasının Dövlət Himninin səsləndirilməsi ilə başlayıb, Ümummilli Lider Heydər Əliyevin və Vətən uğrunda canından keçmiş şəhidlərimizin əziz xatirəsi bir dəqiqəlik sükutla yad olunub.

Tədbirdə çıxış edən Azərbaycan Respublikası Prezidentinin iqlim məsələləri üzrə nümayəndəsi Muxtar Babayev konfransın əhəmiyyətini qeyd edib, qlobal iqlim dəyişmələri və onun fəsadlarından, Azərbaycanın iqlim dəyişmələri siyasətindən söz açıb, “yaşıl keçid” və ətraf mühitin qorunması istiqamətində həyata keçirilən tədbirlərdən danışıb. Bildirilib ki, ölkəmizdə ətraf mühitin sağlamlaşdırılması, yaşıllıqların artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində işlər aparılır. “Yaşıl keçid” prosesində işçilərin yeni bacarıqlarının formalaşdırılması və məşğulluq imkanlarının artırılması xüsusi önəm daşıyır. Həmkarlar ittifaqlarının bu prosesdə fəal iştirakı inklüziv, ədalətli və şəffaf yanaşmaların təmin edilməsi baxımından vacibdir.

Konfederasiya sədri Sahib Məmmədov çıxışında Azərbaycanın qlobal iqlim fəaliyyətinə töhfə verən ölkələr sırasında olduğunu və cənab Prezident İlham Əliyevin rəhbərliyi ilə bu sahədə məqsədyönlü və sistemli tədbirlərin həyata keçirildiyini deyib. Diqqətə çatdırılıb ki, iqlim dəyişmələri eyni zamanda sosial və əmək münasibətlərinə təsir göstərən qlobal çağırışdır. Bu baxımdan əmək bazarında baş verən dəyişikliklər həmkarlar ittifaqlarından daha çevik və koordinasiyalı fəaliyyət tələb edir. “Ədalətli keçid” prinsiplərinin təmin olunması, işçilərin maraqlarının qorunması və sosial dialoqun gücləndirilməsinin əsas prioritetlərdən olduğunu bildirən Konfederasiya sədri AHİK-in bu istiqamətdə beynəlxalq tərəfdaşlarla əməkdaşlığı davam etdirdiyini və dövlətimizin sosial siyasətinə dəstək verdiyini vurğulayıb.

Türkmənistan Milli Həmkarlar İttifaqları Mərkəzinin sədri xanım Oğulcənnət Berdiliyeva qlobal iqlim dəyişmələri fonunda bu kimi beynəlxalq platformaların təcrübə mübadiləsinin aparılması və birgə yanaşmaların formalaşdırılması baxımından mühüm əhəmiyyət daşıdığını deyib. Onun sözlərinə görə, hazırkı şəraitdə həmkarlar ittifaqları əmək bazarındakı dəyişikliklərə daha operativ qaydada uyğunlaşmalı və işçilərin sosial müdafiəsinin gücləndirilməsi ilə bağlı məsələlərə reaksiyanı artırmalıdır.

Əmək və əhalinin sosial müdafiəsi nazirinin müavini Zaur Əliyev dövlət siyasətində iqlim dəyişmələrinin sosial nəticələrinə önəm verildiyini, həmçinin əmək bazarının dayanıqlığının gücləndirilməsinin və işçi qüvvəsinin müasir çağırışlar və gələcək trendlərə hesablanmış qaydada hazırlanmasının əsas prioritetlər sırasında olduğunu bildirib. Bu istiqamətdə əməkdaşlığın əhəmiyyətini qeyd edib.
Milli Məclisin Əmək və sosial siyasət komitəsinin sədri Musa Quliyev iqlim dəyişmələrinin sosial nəticələrinin qanunvericilik baxımından əhəmiyyətini bildirib. Diqqətə çatdırılıb ki, “yaşıl iqtisadiyyat”a keçid sosial tərəfdaşlıq mexanizmlərinin gücləndirilməsi və bu proseslərin hüquqi müstəvidə dəstəklənməsi üçün mühüm rola malikdir.

İƏT-in Əmək Mərkəzinin baş direktoru Azər Bayramov iqlim çağırışlarının qlobal əmək bazarında yeni yanaşmalar tələb etdiyini, İƏT çərçivəsində əmək və sosial müdafiə sahələrində ortaq təşəbbüslərin genişləndirilməsinin önəmli xarakter daşıdığını deyib.
İqtisadiyyat nazirinin müşaviri Hüseyn Hüseynov isə qeyd edib ki, qlobal iqtisadi inkişaf fonunda Azərbaycanın iqtisadi siyasəti rəqabətqabiliyyətli və innovasiya yönümlüdür. O həmçinin yaşıl iqtisadi yanaşmaların genişləndirilməsinin həm investisiya mühitinin yaxşılaşdırılmasına, həm də iqtisadiyyatın daha dayanıqlı struktura keçidinə şərait yaratdığını deyib.

Konfransa onlayn qoşulan və tədbirin aktual mövzuya həsr olduğunu vurğulayan BƏT-ACTRAV-ın Avropa və Mərkəzi Asiya üzrə rəhbəri Serqius Qlovaskas bildirib ki, iqlim dəyişmələrinin sosial və məşğulluqla bağlı təsirlərini nəzərə alan BƏT “ədalətli keçid” yanaşmasını təşviq edir və iqlim gündəliyində həmkarlar ittifaqlarının fəal iştirakını dəstəkləyir.
Tədbirdə BƏT-in baş mütəxəssisi Qoça Aleksandria “Ədalətli keçiddə həmkarlar ittifaqlarının rolu” mövzusunda təqdimatla çıxış edib.

Sonra “İqlim dəyişikliyi və əmək dünyası” mövzusunda panel müzakirələr aparılıb.

Tədbir çərçivəsində AHİK tərəfindən son illərdə həmkarlar ittifaqları sistemində həyata keçirilən islahatları və tətbiq olunan innovativ yenilikləri əks etdirən videoçarx nümayiş etdirilib.

Eyni zamanda, ticarət əlaqələrimiz də çox yaxşı vəziyyətdədir. İtaliya Azərbaycanın bir nömrəli ticarət tərəfdaşıdır. Keçən il bizim ticarət dövriyyəmiz təxminən 12 milyard dollar təşkil etmişdir. Təbii ki, əlaqələrimizin əsas istiqamətlərindən biri energetika sahəsində tərəfdaşlıqdır. Burada da biz uzun illər ərzində etibarlı tərəfdaşlar kimi bir-birimizi dəstəkləyirik. Azərbaycan İtaliyanın neft təchizatında ikinci yerdədir, qaz təchizatında da ikinci yerdədir.